HEDD WYN (ELLIS EVANS)

Rhyfel

Gwae fi fy myw mewn oes mor ddreng,

       A Duw ar drai ar orwel pell;

O'i ôl mae dyn, yn deyrn a gwreng,

       Yn codi ei awdurdod.hell.

Pan deimlodd fyned ymaith Dduw

       Cyfododd gledd i ladd ei frawd;

Mae swn yr ymladd ar ein clyw,

       A'i gysgod ar fythynnod tlawd.

Mae'r hen delynau genid gynt

       Ynghrog ar gangau'r helyg draw,

A gwaedd y bechgyn lond y gwynt,

       A'u gwaed yn gymysg efo'r glaw.