HUW T. EDWARDS

Lleisiau'r Cynfyd

Mae nefoedd y mynyddoedd yn fy ngwaed

A lliwiau'r grug o ardd fy Eden gynt

Yn procio'r un hen dynfa wyllt i'm traed,

A lleisiau'r cynfyd sy'n areithfa'r gwynt;

Mae'r Capel Bach a Thal-y-fan yn un,

Fel gwedd y Gorswen yn aredig dôl;

Hwyntwy a'u deiliaid welaf ym mhob llun

Yn galw, galw: "Brysia adre'n ôl"

Pan af yn ôl mae'r llun yn newid lliw;

'D oes neb ar ôl i falu'r eithin mân,

Na neb i roddi olew ar fy mriw,

'R un Wi Pen-Parc i roi y Foel ar dân;

Mae'r cerrig geirwon fu'n aelwydydd llon

Yn gwanu fel cyllyll amser dan fy mron.